wo jo ab dil ki rahguzar mein nahin

vo jo ab dil kī rahguzar meñ nahīñ

vaqt kahtā hai maiñ safar meñ nahīñ

merī dīvāngī bhī ḳhatm huī

tere jalve bhī ab nazar meñ nahīñ

kyā ġham-e-yār kyā ḳhayāl-e-bahār

aaj saudā bhī koī sar meñ nahīñ

ham sā kyā hogā koī be-sāmāñ

haa.e nām-e-ḳhudā bhī ghar meñ nahīñ

vaj.h-e-rusvā.ī hai yahāñ har baat

aib meñ kyā hai jo hunar meñ nahīñ

maiñ huuñ tere jamāl se sozāñ

apnā kuchh tābish-e-qamar meñ nahīñ

ek dīvār-e-tīrgī ke sivā

koī manzar bhī 'arsh' dar meñ nahīñ

wo jo ab dil ki rahguzar mein nahin

waqt kahta hai main safar mein nahin

meri diwangi bhi KHatm hui

tere jalwe bhi ab nazar mein nahin

kya gham-e-yar kya KHayal-e-bahaar

aaj sauda bhi koi sar mein nahin

hum sa kya hoga koi be-saman

hae nam-e-KHuda bhi ghar mein nahin

wajh-e-ruswai hai yahan har baat

aib mein kya hai jo hunar mein nahin

main hun tere jamal se sozan

apna kuchh tabish-e-qamar mein nahin

ek diwar-e-tirgi ke siwa

koi manzar bhi 'arsh' dar mein nahin