wo jo tha wo kabhi mila hi nahin

vo jo thā vo kabhī milā hī nahīñ

so garebāñ kabhī silā hī nahīñ

us se har dam mo.āmla hai magar

darmiyāñ koī silsila hī nahīñ

be-mile hī bichhaḌ ga.e ham to

sau gile haiñ koī gila hī nahīñ

chashm-e-maigūñ se hai muġhāñ ne kahā

mast kar de magar pilā hī nahīñ

tū jo hai jaan tū jo hai jānāñ

tū hameñ aaj tak milā hī nahīñ

mast huuñ maiñ mahak se us gul kī

jo kisī baaġh meñ khilā hī nahīñ

haa.e 'jaun' us kā vo piyāla-e-nāf

jaam aisā koī milā hī nahīñ

tū hai ik umr se fuġhāñ-pesha

abhī siina tirā chhilā hī nahīñ

wo jo tha wo kabhi mila hi nahin

so gareban kabhi sila hi nahin

us se har dam moamla hai magar

darmiyan koi silsila hi nahin

be-mile hi bichhaD gae hum to

sau gile hain koi gila hi nahin

chashm-e-maigun se hai mughan ne kaha

mast kar de magar pila hi nahin

tu jo hai jaan tu jo hai jaanan

tu hamein aaj tak mila hi nahin

mast hun main mahak se us gul ki

jo kisi bagh mein khila hi nahin

hae 'jaun' us ka wo piyala-e-naf

jam aisa koi mila hi nahin

tu hai ek umr se fughan-pesha

abhi sina tera chhila hi nahin