wo kam-amez mujhse ham-suKHan hone laga hai

vo kam-āmez mujh se ham-suḳhan hone lagā hai

ba-yak lahza ye dasht-e-dil chaman hone lagā hai

suhūlat se vo paḌhtā jā rahā hai zehn merā

badan sochoñ kā phir be-pairahan hone lagā hai

mirī tanhā.ī aur vahshat meñ phir se Than ga.ī hai

yuuñ lagtā hai koī ghamsān ran hone lagā hai

atā kiije mire murshid mujhe koī vazīfa

mirā dil phir se duniyā meñ magan hone lagā hai

ye rūhoñ ke milan kī kar na de masdūd rāheñ

ki haa.il is milan meñ ab badan hone lagā hai

pakaḌ hī lī jaḌeñ ulfat ne āḳhir is zamīñ meñ

dayār-e-ġhair ab merā vatan hone lagā hai

biThā rakkhe haiñ us ne mujh pe yuuñ nādīda pahre

khulā māhaul bhī man kī ghuTan hone lagā hai

mire tarz-e-takallum meñ thā jo be-sāḳhta-pan

vahī mere suḳhan kā bāñkpan hone lagā hai

jahāñ tyāgā 'tabassum' jis ko apnāne kī ḳhātir

usī se ab bichhaḌne kā jatan hone lagā hai

wo kam-amez mujh se ham-suKHan hone laga hai

ba-yak lahza ye dasht-e-dil chaman hone laga hai

suhulat se wo paDhta ja raha hai zehn mera

badan sochon ka phir be-pairahan hone laga hai

meri tanhai aur wahshat mein phir se Than gai hai

yun lagta hai koi ghamsan ran hone laga hai

ata kije mere murshid mujhe koi wazifa

mera dil phir se duniya mein magan hone laga hai

ye ruhon ke milan ki kar na de masdud rahen

ki hail is milan mein ab badan hone laga hai

pakaD hi li jaDen ulfat ne aaKHir is zamin mein

dayar-e-ghair ab mera watan hone laga hai

biTha rakkhe hain us ne mujh pe yun nadida pahre

khula mahaul bhi man ki ghuTan hone laga hai

mere tarz-e-takallum mein tha jo be-saKHta-pan

wahi mere suKHan ka bankpan hone laga hai

jahan tyaga 'tabassum' jis ko apnane ki KHatir

usi se ab bichhaDne ka jatan hone laga hai