wo KHud gaya hai us ka asar to nahin gaya

vo ḳhud gayā hai us kā asar to nahīñ gayā

zād-e-safar gayā hai safar to nahīñ gayā

mausam hī sirf badlā hai us ke mizāj kā

shāḳh-e-samar kaTī hai samar to nahīñ gayā

duniyā samajh rahī hai use bevafā magar

raste se uTh gayā hai vo ghar to nahīñ gayā

rah rah ke pūchhtī hai kaf-e-pā se chāñdnī

is raah se vo rashk-e-qamar to nahīñ gayā

dasht-e-junūñ pe girya-e-bārāñ thā raat bhar

dīvāna terā jaañ se guzar to nahīñ gayā

kis baat se ḳhajil huuñ sar-e-koh-e-tūr maiñ

tāb-e-nazar meñ zauq-e-nazar to nahīñ gayā

bikhre paḌe haiñ farsh pe va.ade na.e na.e

ā.īna-gar se aa.ina Dar to nahīñ gayā

tāriq-'na.īm' rahne lage ho malūl se

koī tumhārā ḳhvāb bikhar to nahīñ gayā

wo KHud gaya hai us ka asar to nahin gaya

zad-e-safar gaya hai safar to nahin gaya

mausam hi sirf badla hai us ke mizaj ka

shaKH-e-samar kaTi hai samar to nahin gaya

duniya samajh rahi hai use bewafa magar

raste se uTh gaya hai wo ghar to nahin gaya

rah rah ke puchhti hai kaf-e-pa se chandni

is rah se wo rashk-e-qamar to nahin gaya

dasht-e-junun pe girya-e-baran tha raat bhar

diwana tera jaan se guzar to nahin gaya

kis baat se KHajil hun sar-e-koh-e-tur main

tab-e-nazar mein zauq-e-nazar to nahin gaya

bikhre paDe hain farsh pe wade nae nae

aaina-gar se aaina Dar to nahin gaya

tariq-'naim' rahne lage ho malul se

koi tumhaara KHwab bikhar to nahin gaya