wo koi aur na tha chand KHushk patte the

vo koī aur na thā chand ḳhushk patte the

shajar se TuuT ke jo fasl-e-gul pe ro.e the

abhī abhī tumheñ sochā to kuchh na yaad aayā

abhī abhī to ham ik dūsre se bichhḌe the

tumhāre ba.ad chaman par jab ik nazar Daalī

kalī kalī meñ ḳhizāñ ke charāġh jalte the

tamām umr vafā ke gunāhgār rahe

ye aur baat ki ham aadmī to achchhe the

shab-e-ḳhamosh ko tanhā.ī ne zabāñ de dī

pahāḌ gūñjte the dasht sansanāte the

vo ek baar mire jin ko thā hayāt se pyaar

jo zindagī se gurezāñ the roz marte the

na.e ḳhayāl ab aate haiñ Dhal ke aahan meñ

hamāre dil meñ kabhī khet lahlahāte the

ye irtiqā kā chalan hai ki har zamāne meñ

purāne log na.e aadmī se Darte the

'nadīm' jo bhī mulāqāt thī adhūrī thī

ki ek chehre ke pīchhe hazār chehre the

wo koi aur na tha chand KHushk patte the

shajar se TuT ke jo fasl-e-gul pe roe the

abhi abhi tumhein socha to kuchh na yaad aaya

abhi abhi to hum ek dusre se bichhDe the

tumhaare baad chaman par jab ek nazar Dali

kali kali mein KHizan ke charagh jalte the

tamam umr wafa ke gunahgar rahe

ye aur baat ki hum aadmi to achchhe the

shab-e-KHamosh ko tanhai ne zaban de di

pahaD gunjte the dasht sansanate the

wo ek bar mere jin ko tha hayat se pyar

jo zindagi se gurezan the roz marte the

nae KHayal ab aate hain Dhal ke aahan mein

hamare dil mein kabhi khet lahlahate the

ye irtiqa ka chalan hai ki har zamane mein

purane log nae aadmi se Darte the

'nadim' jo bhi mulaqat thi adhuri thi

ki ek chehre ke pichhe hazar chehre the