vo kyā likhtā jise inkār karte bhī hijāb aayā
javāb-e-ḳhat nahīñ aayā to ye samjho javāb aayā
qarīb-e-sub.h ye kah kar ajal ne aañkh jhapkā dī
are o hijr ke maare tujhe ab tak na ḳhvāb aayā
dil is āvāz ke sadqe ye mushkil meñ kahā kis ne
na ghabrānā na ghabrānā maiñ aayā aur shitāb aayā
koī qitāl-sūrat dekh lī marne lage us par
ye maut ik ḳhushnumā parde meñ aa.ī yā shabāb aayā
purāne ahd TuuTe ho ga.e paimāñ na.e qaa.em
banā dī us ne duniyā dūsrī jo inqalāb aayā
guzargāh-e-mohabbat ban ga.ī ik mustaqil bastī
lagā kar aag aayā ghar ko jo ḳhāna-ḳharāb aayā
muamma ban gayā rāz-e-mohabbat 'ārzū' yūñhī
vo mujh se pūchhte jhijke mujhe kahte hijāb aayā
wo kya likhta jise inkar karte bhi hijab aaya
jawab-e-KHat nahin aaya to ye samjho jawab aaya
qarib-e-subh ye kah kar ajal ne aankh jhapka di
are o hijr ke mare tujhe ab tak na KHwab aaya
dil is aawaz ke sadqe ye mushkil mein kaha kis ne
na ghabrana na ghabrana main aaya aur shitab aaya
koi qital-surat dekh li marne lage us par
ye maut ek KHushnuma parde mein aai ya shabab aaya
purane ahd TuTe ho gae paiman nae qaem
bana di us ne duniya dusri jo inqalab aaya
guzargah-e-mohabbat ban gai ek mustaqil basti
laga kar aag aaya ghar ko jo KHana-KHarab aaya
muamma ban gaya raaz-e-mohabbat 'arzu' yunhi
wo mujh se puchhte jhijke mujhe kahte hijab aaya
Source:
Karwaan-e-Ghazal (Pg. 38)
-
Author:
Farooq Argali
-
- Edition: 2004
- Publisher: Farid Book Depot (Pvt.) Ltd
- Year of Publication: 2004
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.