wo mahfilen purani afsana ho rahi hain

vo mahfileñ purānī afsāna ho rahī haiñ

is bazm meñ to sham.eñ parvāna ho rahī haiñ

shāyad ki maiñ bahut jald islām tark kar duuñ

bāteñ jo ek but se rozāna ho rahī haiñ

hai had-e-dil se aage raftār us ke ḳhuuñ kī

aur dhaḌkaneñ bhī ḳhud se begāna ho rahī haiñ

maiñ hans rahā huuñ sun kar baare meñ zindagī ke

kyā jism-o-jāñ meñ bāteñ bachkāna ho rahī haiñ

bāġh-e-badan meñ us ke be-rañg-o-bū rahe ham

ab ḳhvāhisheñ ba-taur-e-jurmāna ho rahī haiñ

pahle bhī ho rahī thiiñ par sirf shā.irī meñ

āñkheñ to ab kī sach-much mai-ḳhāna ho rahī haiñ

miTTī ke kaan meñ ye kyā kah diyā havā ne

sab ḳhvāhisheñ badan se begāna ho rahī haiñ

ik din jo 'farhat-ehsās' uTThā namāz paḌhne

dekhā ki masjideñ ḳhud but-ḳhāna ho rahī haiñ

wo mahfilen purani afsana ho rahi hain

is bazm mein to shamen parwana ho rahi hain

shayad ki main bahut jald islam tark kar dun

baaten jo ek but se rozana ho rahi hain

hai had-e-dil se aage raftar us ke KHun ki

aur dhaDkanen bhi KHud se begana ho rahi hain

main hans raha hun sun kar bare mein zindagi ke

kya jism-o-jaan mein baaten bachkana ho rahi hain

bagh-e-badan mein us ke be-rang-o-bu rahe hum

ab KHwahishen ba-taur-e-jurmana ho rahi hain

pahle bhi ho rahi thin par sirf shairi mein

aankhen to ab ki sach-much mai-KHana ho rahi hain

miTTi ke kan mein ye kya kah diya hawa ne

sab KHwahishen badan se begana ho rahi hain

ek din jo 'farhat-ehsas' uTTha namaz paDhne

dekha ki masjiden KHud but-KHana ho rahi hain