wo mera dard-e-dil kya jaante hain

vo merā dard-e-dil kyā jānte haiñ

taḌapne ko tamāshā jānte haiñ

bahār-e-gul hai ḳhaar āñkhoñ meñ tujh bin

chaman ko ham to sahrā jānte haiñ

kaheñ kyā hāl-e-dil apnā butoñ se

jo hai dil meñ tamannā jānte haiñ

satānā qatl karnā phir jalānā

vo be-ta.alīm kyā kyā jānte haiñ

maleñ ham kyuuñ na āñkheñ barg-e-gul se

ise terā kaf-e-pā jānte haiñ

raqīboñ par sitam itnā na kiije

unheñ bhī aap ham sā jānte haiñ

yahāñ tak ijz ke ḳhūgar haiñ 'ġhāfil'

buroñ ko bhī ham achchhā jānte haiñ

wo mera dard-e-dil kya jaante hain

taDapne ko tamasha jaante hain

bahaar-e-gul hai KHar aankhon mein tujh bin

chaman ko hum to sahra jaante hain

kahen kya haal-e-dil apna buton se

jo hai dil mein tamanna jaante hain

satana qatl karna phir jalana

wo be-talim kya kya jaante hain

malen hum kyun na aankhen barg-e-gul se

ise tera kaf-e-pa jaante hain

raqibon par sitam itna na kije

unhen bhi aap hum sa jaante hain

yahan tak ijz ke KHugar hain 'ghafil'

buron ko bhi hum achchha jaante hain