wo mere bare mein aise bhi sochta kab tha

vo mere baare meñ aise bhī sochtā kab thā

agar maiñ aks nahīñ thī vo aa.ina kab thā

jo joḌ detā ta.alluq ke sab ravābit ko

hamāre biich koī aisā silsila kab thā

vo ziina ziina mire dil meñ yuuñ utartā gayā

maiñ rok paatī use mujh meñ hausla kab thā

vo ḳhush-gumān bahut thā ki maiñ huuñ us kī magar

ye aarzū thī faqat merā faisla kab thā

vo mere zabt ko har aan āzmātā rahā

maiñ sañg-zād huuñ us ko magar pata kab thā

sunā nahīñ jo kahā thā to kaise samjhāte

jo us ne samjhā thā merā vo mudda.ā kab thā

bahār ban ke vo milne to aa gayā thā mujhe

Thahar bhī jā.egā ye us kā faisla kab thā

wo mere bare mein aise bhi sochta kab tha

agar main aks nahin thi wo aaina kab tha

jo joD deta talluq ke sab rawabit ko

hamare bich koi aisa silsila kab tha

wo zina zina mere dil mein yun utarta gaya

main rok pati use mujh mein hausla kab tha

wo KHush-guman bahut tha ki main hun us ki magar

ye aarzu thi faqat mera faisla kab tha

wo mere zabt ko har aan aazmata raha

main sang-zad hun us ko magar pata kab tha

suna nahin jo kaha tha to kaise samjhate

jo us ne samjha tha mera wo muddaa kab tha

bahaar ban ke wo milne to aa gaya tha mujhe

Thahar bhi jaega ye us ka faisla kab tha