wo mere pas hai kya pas bulaun usko

vo mire paas hai kyā paas bulā.ūñ us ko

dil meñ rahtā hai kahāñ DhūñDne jā.ūñ us ko

aaj phir pahlī mulāqāt se āġhāz karūñ

aaj phir duur se hī dekh ke aa.uuñ us ko

qaid kar luuñ use āñkhoñ ke nihāñ-ḳhāne meñ

chāhtā huuñ ki kisī se na milā.ūñ us ko

use duniyā kī nigāhoñ se karūñ maiñ mahfūz

vo vahāñ ho ki jahāñ dekh na pā.ūñ us ko

chalnā chāhe to rakhe paañv mire siine par

baiThnā chāhe to āñkhoñ pe biThā.ūñ us ko

vo mujhe itnā subuk itnā subuk lagtā hai

kabhī gir jaa.e to palkoñ se uThā.ūñ us ko

mujhe ma.alūm hai āḳhir ko judā honā hai

lekin ik baar to siine se lagā.ūñ us ko

yaad se us kī nahīñ ḳhālī koī bhī lamha

phir bhī Dartā huuñ kahīñ bhuul na jā.ūñ us ko

mujh pe ye raaz isī ek havāle se khulā

baat us kī hai magar kaise batā.ūñ us ko

ye mirā dil mirā dushman mirā dīvāna dil

chāhtā hai ki sabhī zaḳhm dikhā.ūñ us ko

aaj to dhuup meñ tezī hī bahut hai varna

apne saa.e se bhī 'shahzād' bachā.ūñ us ko

wo mere pas hai kya pas bulaun us ko

dil mein rahta hai kahan DhunDne jaun us ko

aaj phir pahli mulaqat se aaghaz karun

aaj phir dur se hi dekh ke aaun us ko

qaid kar lun use aankhon ke nihan-KHane mein

chahta hun ki kisi se na milaun us ko

use duniya ki nigahon se karun main mahfuz

wo wahan ho ki jahan dekh na paun us ko

chalna chahe to rakhe panw mere sine par

baiThna chahe to aankhon pe biThaun us ko

wo mujhe itna subuk itna subuk lagta hai

kabhi gir jae to palkon se uThaun us ko

mujhe malum hai aaKHir ko juda hona hai

lekin ek bar to sine se lagaun us ko

yaad se us ki nahin KHali koi bhi lamha

phir bhi Darta hun kahin bhul na jaun us ko

mujh pe ye raaz isi ek hawale se khula

baat us ki hai magar kaise bataun us ko

ye mera dil mera dushman mera diwana dil

chahta hai ki sabhi zaKHm dikhaun us ko

aaj to dhup mein tezi hi bahut hai warna

apne sae se bhi 'shahzad' bachaun us ko