wo mujhko dekh na pae main mustaqil dekhun

vo mujh ko dekh na paa.e maiñ mustaqil dekhūñ

sitāra jaise koī duur jagmagā.e kabhī

banūñ maiñ lahr kabhī aur vo merā sāhil ho

maiñ us ko DhūñDne jā.ūñ vo mujh ko paa.e kabhī

ġhubār-e-rāh kī vahshat havā pe likkhī thī

magar ye log vo tahrīr paḌh na paa.e kabhī

tumhāre shahr se izzat junūñ kī jaatī hai

gharoñ pe shīshe lagāo ki sang aa.e kabhī

yahī duā hai mirī bas ki mere rabb-e-azīm

gayā hai ab jo musāfir to lauT aa.e kabhī

wo mujh ko dekh na pae main mustaqil dekhun

sitara jaise koi dur jagmagae kabhi

banun main lahr kabhi aur wo mera sahil ho

main us ko DhunDne jaun wo mujh ko pae kabhi

ghubar-e-rah ki wahshat hawa pe likkhi thi

magar ye log wo tahrir paDh na pae kabhi

tumhaare shahr se izzat junun ki jati hai

gharon pe shishe lagao ki sang aae kabhi

yahi dua hai meri bas ki mere rabb-e-azim

gaya hai ab jo musafir to lauT aae kabhi