wo naw Dub gai ab kinara chal raha hai

vo naav Duub ga.ī ab kināra chal rahā hai

Thahar gayā thā samundar dubārā chal rahā hai

ye kis ke ḳhvāb meñ lau de rahī hai chhab kis kī

ye kis kī niiñd meñ kis kā sitāra chal rahā hai

abhī to faisla aayā nahīñ mohabbat kā

abhī se kuchh na kaho istiḳhārā chal rahā hai

Thaharnā chāheñ bhī ham to Thahar nahīñ sakte

hamāre saath zamāna hamārā chal rahā hai

maqām tai-shuda hote haiñ dahr meñ sab ke

zamīñ pe phuul falak pe sitāra chal rahā hai

zarā jadīd zamāne kī psyche samjho

suḳhan ko nā'ra banāo ki nā'ra chal rahā hai

miTā hī degī ajal lauh se hameñ 'āzar'

jahāñ meñ naam koī din hamārā chal rahā hai

wo naw Dub gai ab kinara chal raha hai

Thahar gaya tha samundar dubara chal raha hai

ye kis ke KHwab mein lau de rahi hai chhab kis ki

ye kis ki nind mein kis ka sitara chal raha hai

abhi to faisla aaya nahin mohabbat ka

abhi se kuchh na kaho istiKHara chal raha hai

Thaharna chahen bhi hum to Thahar nahin sakte

hamare sath zamana hamara chal raha hai

maqam tai-shuda hote hain dahr mein sab ke

zamin pe phul falak pe sitara chal raha hai

zara jadid zamane ki psyche samjho

suKHan ko na'ra banao ki na'ra chal raha hai

miTa hi degi ajal lauh se hamein 'azar'

jahan mein nam koi din hamara chal raha hai