vo nigāheñ kyā kahūñ kyuuñ kar rag-e-jāñ ho ga.iiñ
dil meñ nashtar ban ke Dūbīñ aur pinhāñ ho ga.iiñ
thiiñ jo kal tak jalva-afrozī se sham-e-anjuman
aaj vo shakleñ charāġh-e-zer-e-dāmāñ ho ga.iiñ
ik nazar ghabrā ke kī apnī taraf us shoḳh ne
hastiyāñ jab miT ke ajzā-e-pareshāñ ho ga.iiñ
dam rukā thā jis kī uljhan se mire siine meñ aah
phir vahī zulfeñ mire ġham meñ pareshāñ ho ga.iiñ
phūñk dī ik ruuh dekhā zor-e-ejāz-e-junūñ
jitnī sāñseñ maiñ ne liiñ tār-e-garebāñ ho ga.iiñ
ishq ke qisse ko ham saada samajhte the magar
jab varaq ulTe to āñkheñ saḳht hairāñ ho ga.iiñ
chand tasvīreñ mirī jo muḳhtalif vaqtoñ kī thiiñ
ba.ad mere zīnat-e-dīvār-e-zindāñ ho ga.iiñ
uḌ ke dil kī ḳhaak ke zarre ga.e jis jis taraf
rafta rafta vo zamīneñ sab bayābāñ ho ga.iiñ
aa.ine meñ aks hai aur aks meñ jazb-e-ḳhalish
dil meñ jo fāñseñ chubhīñ tasvīr-e-mizgāñ ho ga.iiñ
us kī shām-e-ġham pe sadqe ho mirī sub.h-e-hayāt
jis ke mātam meñ tirī zulfeñ pareshāñ ho ga.iiñ
shām-e-va.ada aa.iye to aap us kī fikr kyā
phir banā dūñgā agar zulfeñ pareshāñ ho ga.iiñ
kis dil-āvāra kī mayyat ghar se niklī hai 'azīz'
shahr kī ābād rāheñ aaj vīrāñ ho ga.iiñ
wo nigahen kya kahun kyun kar rag-e-jaan ho gain
dil mein nashtar ban ke Dubin aur pinhan ho gain
thin jo kal tak jalwa-afrozi se sham-e-anjuman
aaj wo shaklen charagh-e-zer-e-daman ho gain
ek nazar ghabra ke ki apni taraf us shoKH ne
hastiyan jab miT ke ajza-e-pareshan ho gain
dam ruka tha jis ki uljhan se mere sine mein aah
phir wahi zulfen mere gham mein pareshan ho gain
phunk di ek ruh dekha zor-e-ejaz-e-junun
jitni sansen main ne lin tar-e-gareban ho gain
ishq ke qisse ko hum sada samajhte the magar
jab waraq ulTe to aankhen saKHt hairan ho gain
chand taswiren meri jo muKHtalif waqton ki thin
baad mere zinat-e-diwar-e-zindan ho gain
uD ke dil ki KHak ke zarre gae jis jis taraf
rafta rafta wo zaminen sab bayaban ho gain
aaine mein aks hai aur aks mein jazb-e-KHalish
dil mein jo fansen chubhin taswir-e-mizgan ho gain
us ki sham-e-gham pe sadqe ho meri subh-e-hayat
jis ke matam mein teri zulfen pareshan ho gain
sham-e-wada aaiye to aap us ki fikr kya
phir bana dunga agar zulfen pareshan ho gain
kis dil-awara ki mayyat ghar se nikli hai 'aziz'
shahr ki aabaad rahen aaj viran ho gain
Source:
Gulkadah(Majmua-e-Ghazliyat) (Pg. e-98 p-70)
-
Author:
Mirza Mohammad Hadi Aziz Lakhnavi
-
- Edition: 1936
- Publisher: Siddique Book Depot, Lucknow
Additional information available
Click on the INTERESTING button to view additional information associated with this sher.
rare Unpublished content
This ghazal contains ashaar not published in the public domain. These are marked by a red line on the left.