wo wada ustuwar kabhi hai kabhi nahin

vo va.ada ustuvār kabhī hai kabhī nahīñ

ham ko bhī e'tibār kabhī hai kabhī nahīñ

ye dahr sāzgār kabhī hai kabhī nahīñ

ummīd-e-ham-kanār kabhī hai kabhī nahīñ

ham rahrav-e-qadīm haiñ aur jānte haiñ ḳhuub

hamvār rahguzār kabhī hai kabhī nahīñ

us ko ayaañ kaheñ ki nihāñ yā kuchh aur hī

jo raaz āshkār kabhī hai kabhī nahīñ

ho dost se tavaqqo-e-lutf-e-davām kyā

jab dil pe iḳhtiyār kabhī hai kabhī nahīñ

zālim tamām umr rahā dil ke ās-pās

ik ġham jo ḳhush-gavār kabhī hai kabhī nahīñ

'mahrūm' tab-e-shā.ir-e-fitrat-nigar ravāñ

mānind-e-jūebār kabhī hai kabhī nahīñ

wo wada ustuwar kabhi hai kabhi nahin

hum ko bhi e'tibar kabhi hai kabhi nahin

ye dahr sazgar kabhi hai kabhi nahin

ummid-e-ham-kanar kabhi hai kabhi nahin

hum rahraw-e-qadim hain aur jaante hain KHub

hamwar rahguzar kabhi hai kabhi nahin

us ko ayan kahen ki nihan ya kuchh aur hi

jo raaz aashkar kabhi hai kabhi nahin

ho dost se tawaqqo-e-lutf-e-dawam kya

jab dil pe iKHtiyar kabhi hai kabhi nahin

zalim tamam umr raha dil ke aas-pas

ek gham jo KHush-gawar kabhi hai kabhi nahin

'mahrum' tab-e-shair-e-fitrat-nigar rawan

manind-e-juebar kabhi hai kabhi nahin