yar ka dhyan hum na chhoDenge

yaar kā dhyān ham na chhoḌeñge

apnī ye aan ham na chhoḌeñge

jab talak dam meñ hai hamāre dam

tujh ko ai jaan ham na chhoḌeñge

tere hāthoñ se ai junūñ sābit

ye garebān ham na chhoḌeñge

hai baḌā kufr tark-e-ishq-e-butāñ

apnā īmān ham na chhoḌeñge

ba.ad majnūñ ke shor se ḳhālī

ye bayābān ham na chhoḌeñge

dil meñ aur ham meñ hai ye qaul-o-qarār

us ko har aan ham na chhoḌeñge

dil na chhoḌegā terā dāman aur

dil kā dāmān ham na chhoḌeñge

bin liye bosa aaj to tujh ko

maan mat maan ham na chhoḌeñge

hai 'hasan' vaañ yahī jo be-qaranī

kab talak shaan ham na chhoḌeñge

yar ka dhyan hum na chhoDenge

apni ye aan hum na chhoDenge

jab talak dam mein hai hamare dam

tujh ko ai jaan hum na chhoDenge

tere hathon se ai junun sabit

ye gareban hum na chhoDenge

hai baDa kufr tark-e-ishq-e-butan

apna iman hum na chhoDenge

baad majnun ke shor se KHali

ye bayaban hum na chhoDenge

dil mein aur hum mein hai ye qaul-o-qarar

us ko har aan hum na chhoDenge

dil na chhoDega tera daman aur

dil ka daman hum na chhoDenge

bin liye bosa aaj to tujh ko

man mat man hum na chhoDenge

hai 'hasan' wan yahi jo be-qarani

kab talak shan hum na chhoDenge