ye aur baat dur rahe manzilon se hum

ye aur baat duur rahe manziloñ se ham

bach kar chale hamesha magar qāfiloñ se ham

hone ko phir shikār na.ī uljhanoñ se ham

milte haiñ roz apne ka.ī dostoñ se ham

barsoñ fareb khāte rahe dūsroñ se ham

apnī samajh meñ aa.e baḌī mushkiloñ se ham

manzil kī hai talab to hameñ saath le chalo

vāqif haiñ ḳhuub raah kī bārīkiyoñ se ham

jin ke paroñ pe sub.h kī ḳhushbū ke rañg haiñ

bachpan udhār laa.e haiñ un titliyoñ se ham

kuchh to hamāre beach kabhī dūriyāñ bhī hoñ

tañg aa ga.e haiñ roz kī nazdīkiyoñ se ham

guzreñ hamāre ghar kī kisī rahguzar se vo

parde haTā.eñ dekheñ unheñ khiḌkiyoñ se ham

jab bhī kahā ki yaad hamārī kahāñ unheñ

pakḌe ga.e haiñ Thiik tabhī hichkiyoñ se ham

ye aur baat dur rahe manzilon se hum

bach kar chale hamesha magar qafilon se hum

hone ko phir shikar nai uljhanon se hum

milte hain roz apne kai doston se hum

barson fareb khate rahe dusron se hum

apni samajh mein aae baDi mushkilon se hum

manzil ki hai talab to hamein sath le chalo

waqif hain KHub rah ki barikiyon se hum

jin ke paron pe subh ki KHushbu ke rang hain

bachpan udhaar lae hain un titliyon se hum

kuchh to hamare beach kabhi duriyan bhi hon

tang aa gae hain roz ki nazdikiyon se hum

guzren hamare ghar ki kisi rahguzar se wo

parde haTaen dekhen unhen khiDkiyon se hum

jab bhi kaha ki yaad hamari kahan unhen

pakDe gae hain Thik tabhi hichkiyon se hum