یہ اور بات ترے دل میں گھر نہیں کروں گا

یہ اور بات ترے دل میں گھر نہیں کروں گا

پر اس مقام سے آگے سفر نہیں کروں گا

دعائیں کیا دوں اسے زندگی کی اتنا ہے

میں زہر ہوں مگر اس پر اثر نہیں کروں گا

کسی سے جھوٹی محبت کسی سے سچا بیر

میں کر تو سکتا ہوں یہ سب مگر نہیں کروں گا

دوام بخش تو سکتا ہوں خامشی کو مگر

یہ کام میں کسی آواز پر نہیں کروں گا

کیا جو وقت پر اس کا مآل دیکھ چکا

کوئی بھی کام میں اب وقت پر نہیں کروں گا

گزار دوں گا میں اپنے فراق میں خود کو

خود اپنے ہونے کی خود کو خبر نہیں کروں گا