ye faqiri hai qanaat ke siwa kya jaane

ye faqīrī hai qanā.at ke sivā kyā jaane

kaun kyā de ke gayā dast-e-duā kyā jaane

aag tan meñ to lagā lenā koī khel hai kyā

kitne majbūr diye hoñge havā kyā jaane

us ko karnā hai tah-e-ḳhāk so kartī jaa.e

kaun hai sīm-badan mauj-e-balā kyā jaane

vo to dariyāoñ ko sairāb kiye jaatī hai

sūkhe khetoñ kī zarūrat ko ghaTā kyā jaane

ashk āñkhoñ meñ bhare hoñ to nazārā kaisā

kāñptā haath koī band-e-qabā kyā jaane

koī zinda na bache vo to yahī chāhte haiñ

kitnā suntā hai ḳhudāoñ kā ḳhudā kyā jaane

us se pahle jo kabhī chūmte phūloñ ko 'fahīm'

kaun sā ġham hai hameñ bād-e-sabā kyā jaane

ye faqiri hai qanaat ke siwa kya jaane

kaun kya de ke gaya dast-e-dua kya jaane

aag tan mein to laga lena koi khel hai kya

kitne majbur diye honge hawa kya jaane

us ko karna hai tah-e-KHak so karti jae

kaun hai sim-badan mauj-e-bala kya jaane

wo to dariyaon ko sairab kiye jati hai

sukhe kheton ki zarurat ko ghaTa kya jaane

ashk aankhon mein bhare hon to nazara kaisa

kanpta hath koi band-e-qaba kya jaane

koi zinda na bache wo to yahi chahte hain

kitna sunta hai KHudaon ka KHuda kya jaane

us se pahle jo kabhi chumte phulon ko 'fahim'

kaun sa gham hai hamein baad-e-saba kya jaane