یہ غم نیا ہے پرانے ہر غم سے مختلف ہے

یہ غم نیا ہے پرانے ہر غم سے مختلف ہے

سو میرا گریہ بھی عام ماتم سے مختلف ہے

تمہاری آواز میں گھلی تازگی سے جانا

وہاں کا موسم یہاں کے موسم سے مختلف ہے

بس اس کو یک طرفہ عشق کا معجزہ سمجھ لیں

ہم اس کے جیسے ہیں اور وہ ہم سے مختلف ہے

کہا تو تھا تم سے تم یہاں کے لئے نہیں ہو

تمہارا پیکر ہی نسل آدم سے مختلف ہے

جوان عمری میں جھک گئی ہے کمر ہماری

یہ ہجر کا خم ہے عمر کے خم سے مختلف ہے

تمام رشتے ہیں اک طرف دوسری طرف ماں

یہ ایک تصویر سارے البم سے مختلف ہے

یہ تم جو کہتے ہو فرق ہے عشق اور جنوں میں

تمہارا مطلب ہے آب شبنم سے مختلف ہے