ye jo talab hai dariya tha kabhi

ye jo tālāb hai dariyā thā kabhī

maiñ yahāñ baiTh ke rotā thā kabhī

tīrgī ne vahāñ dekhā hai mujhe

raushnī ne jahāñ sochā thā kabhī

apnī tafhīm kā zindānī lafz

shāḳh-e-ma.anī pe chahaktā thā kabhī

ab charā-gāh hai ta.abīroñ kī

mere ḳhvāboñ kā jazīra thā kabhī

yaad paḌtā hai tirī fursat meñ

maiñ kisī kaam se aayā thā kabhī

aaj rotī hai jo mere uupar

maiñ isī baat pe hañstā thā kabhī

ab to nazreñ bhī churā letā hai

jo mujhe ḳhvāb dikhātā thā kabhī

apnī vus.at ko nikaltā ye hujūm

merī tanhā.ī se uljhā thā kabhī

ye jo andar kā tamāshā.ī hai

mere bāhar kā tamāshā thā kabhī

ye jo talab hai dariya tha kabhi

main yahan baiTh ke rota tha kabhi

tirgi ne wahan dekha hai mujhe

raushni ne jahan socha tha kabhi

apni tafhim ka zindani lafz

shaKH-e-mani pe chahakta tha kabhi

ab chara-gah hai tabiron ki

mere KHwabon ka jazira tha kabhi

yaad paDta hai teri fursat mein

main kisi kaam se aaya tha kabhi

aaj roti hai jo mere upar

main isi baat pe hansta tha kabhi

ab to nazren bhi chura leta hai

jo mujhe KHwab dikhata tha kabhi

apni wusat ko nikalta ye hujum

meri tanhai se uljha tha kabhi

ye jo andar ka tamashai hai

mere bahar ka tamasha tha kabhi