ye mahr o mah be-charagh aaise ki rakh ban kar bikhar rahe hain

ye mahr o mah be-charāġh aaise ki raakh ban kar bikhar rahe haiñ

ham apnī jaañ kā diyā bujhā.e kisī galī se guzar rahe haiñ

ye dukh jo matlūb kā milā hai fishār apnī hī zaat kā hai

ki ham ḳhud apnī talāsh meñ haiñ aur apne sadmoñ se mar rahe haiñ

vajūd kyuuñ hai shuhūd kyuuñ hai sabāt kyā hai najāt kyā hai

inhī savāloñ kī aag le kar ham apnā isbāt kar rahe haiñ

ai vaqt ke be-qayās dhāre kidhar haiñ vo ham-nasab hamāre

jo ek zinda ḳhabar kī ḳhātir ḳhud aap se be-ḳhabar rahe haiñ

aziyyatoñ kā nuzūl mauqūf ḳhaak uḌāne hī par nahīñ hai

azaab un ko bhī to mile haiñ jo log apne hī ghar rahe haiñ

nazar meñ itnī shabāhateñ haiñ ki us kī pahchān kho ga.ī hai

samā.atoñ meñ hai shor itnā ki har sadā se mukar rahe haiñ

hamāre andar kā ḳhauf 'sābir' shikast dene lagā hai ham ko

lahū kī rut ab guzar ga.ī hai diloñ meñ sahrā utar rahe haiñ

ye mahr o mah be-charagh aaise ki rakh ban kar bikhar rahe hain

hum apni jaan ka diya bujhae kisi gali se guzar rahe hain

ye dukh jo matlub ka mila hai fishaar apni hi zat ka hai

ki hum KHud apni talash mein hain aur apne sadmon se mar rahe hain

wajud kyun hai shuhud kyun hai sabaat kya hai najat kya hai

inhi sawalon ki aag le kar hum apna isbaat kar rahe hain

ai waqt ke be-qayas dhaare kidhar hain wo ham-nasab hamare

jo ek zinda KHabar ki KHatir KHud aap se be-KHabar rahe hain

aziyyaton ka nuzul mauquf KHak uDane hi par nahin hai

azab un ko bhi to mile hain jo log apne hi ghar rahe hain

nazar mein itni shabahaten hain ki us ki pahchan kho gai hai

samaaton mein hai shor itna ki har sada se mukar rahe hain

hamare andar ka KHauf 'sabir' shikast dene laga hai hum ko

lahu ki rut ab guzar gai hai dilon mein sahra utar rahe hain