ye masala hai aur koi masala nahin

ye mas.ala hai aur koī mas.ala nahīñ

apnā harīf maiñ huuñ koī dūsrā nahīñ

kal mujh pe khul gayā tirā husn-e-munāfiqat

is sānehe ke ba.ad koī sāneha nahīñ

muflis nahīñ hai zehn-e-tahī-dast huuñ to kyā

dast-e-talab darāz kahīñ bhī kiyā nahīñ

har-gām-o-har-nafas rahe darpesh marhale

zauq-e-safar gavāh ki maiñ bhī rukā nahīñ

ai maslahat-pasand hamārā bhī tere saath

har-chand rābta hai magar rābta nahīñ

duniyā se chand roz meñ sab kuchh to mil gayā

milnā ab aur kyā hai jo ab tak milā nahīñ

mumkin nahīñ ki aa.eñ azā.em meñ laġhzisheñ

uftāda vaqt hī to hai uftād-pā nahīñ

chhoTā huuñ is liye mujhe ehsāñ haiñ sab ke yaad

mohsin ko bhuul jā.ūñ maiñ itnā baḌā nahīñ

ahvāl vāqa.ī to hai ḳhud hī zabān-e-jāñ

lekin sar-e-ġhurūr kahīñ bhī jhukā nahīñ

maiñ tujh ko yaad aa.uuñ aur aa.uuñ tamām-umr

ai dost maiñ burā huuñ par itnā burā nahīñ

jau bone vaale bo ke to jau chal diye magar

kahte haiñ ab ke fasl meñ gandum ugā nahīñ

ḳhvāb-e-baqā kī bas yahī ta.abīr hai ki 'lais'

duniyā meñ sirf ek fanā ko fanā nahīñ

ye masala hai aur koi masala nahin

apna harif main hun koi dusra nahin

kal mujh pe khul gaya tera husn-e-munafiqat

is sanehe ke baad koi saneha nahin

muflis nahin hai zehn-e-tahi-dast hun to kya

dast-e-talab daraaz kahin bhi kiya nahin

har-gam-o-har-nafas rahe darpesh marhale

zauq-e-safar gawah ki main bhi ruka nahin

ai maslahat-pasand hamara bhi tere sath

har-chand rabta hai magar rabta nahin

duniya se chand roz mein sab kuchh to mil gaya

milna ab aur kya hai jo ab tak mila nahin

mumkin nahin ki aaen azaem mein laghzishen

uftada waqt hi to hai uftad-pa nahin

chhoTa hun is liye mujhe ehsan hain sab ke yaad

mohsin ko bhul jaun main itna baDa nahin

ahwal waqai to hai KHud hi zaban-e-jaan

lekin sar-e-ghurur kahin bhi jhuka nahin

main tujh ko yaad aaun aur aaun tamam-umr

ai dost main bura hun par itna bura nahin

jau bone wale bo ke to jau chal diye magar

kahte hain ab ke fasl mein gandum uga nahin

KHwab-e-baqa ki bas yahi tabir hai ki 'lais'

duniya mein sirf ek fana ko fana nahin