ye raat bhayanak hijr ki hai kaTenge baDe aalam se hum

ye raat bhayānak hijr kī hai kāTeñge baḌe ālām se ham

Talne kī nahīñ ye kaalī balā samjhe hue the shaam se ham

jab qais pahāḌ is sar se Tale iid aa.ī tab aa.ī jaan meñ jaan

tā der ajab aalam meñ rahe hoñToñ ko milā.e jaam se ham

thā maut kā khaTkā jāñ-farsā sad shukr ki niklā vo kāñTā

gar ho na qayāmat kā dhaḌkā ab to haiñ baḌe ārām se ham

tā-manzil-e-jānāñ saath rahā kam-baḳht tasavvur ġhairoñ kā

shauq apne qadam khīñchā hī kiyā palTā hī kiye har gaam se ham

ulfat ne unhīñ kī haq kī taraf pherā mire dil ko shukr-e-ḳhudā

tāmīr kareñ masjid koī kyūñkar na butoñ ke naam se ham

ai ham-nafaso dam lene do bhūle hue naġhme yaad aa leñ

aa.e haiñ chaman meñ uḌ ke abhī chhūTe haiñ isī dam daam se ham

bātoñ meñ guzarte hijr ke din ai kaash ki donoñ mil jaate

ham se hai dil-e-nākām ḳhafā āzurda dil-e-nākām se ham

yuuñ un ke adab yā ḳhātir se har baat ko le leñ apne sar

jab dil hai unhīñ ke qaabū meñ phir paak haiñ har ilzām se ham

vo samjhe ki ham ne maar liyā ham samjhe mileñge āḳhir vo

milte hī nigah ke donoñ ḳhush āġhāz se vo anjām se ham

duniyā meñ taḳhallus koī na thā kyā niil kā Tiikā 'shād' hī thā

tum vaj.h na pūchho kuchh is kī chiḌh jaate haiñ kyuuñ is naam se ham

ye raat bhayanak hijr ki hai kaTenge baDe aalam se hum

Talne ki nahin ye kali bala samjhe hue the sham se hum

jab qais pahaD is sar se Tale id aai tab aai jaan mein jaan

ta der ajab aalam mein rahe honTon ko milae jam se hum

tha maut ka khaTka jaan-farsa sad shukr ki nikla wo kanTa

gar ho na qayamat ka dhaDka ab to hain baDe aaram se hum

ta-manzil-e-jaanan sath raha kam-baKHt tasawwur ghairon ka

shauq apne qadam khincha hi kiya palTa hi kiye har gam se hum

ulfat ne unhin ki haq ki taraf phera mere dil ko shukr-e-KHuda

tamir karen masjid koi kyunkar na buton ke nam se hum

ai ham-nafaso dam lene do bhule hue naghme yaad aa len

aae hain chaman mein uD ke abhi chhuTe hain isi dam dam se hum

baaton mein guzarte hijr ke din ai kash ki donon mil jate

hum se hai dil-e-nakaam KHafa aazurda dil-e-nakaam se hum

yun un ke adab ya KHatir se har baat ko le len apne sar

jab dil hai unhin ke qabu mein phir pak hain har ilzam se hum

wo samjhe ki hum ne mar liya hum samjhe milenge aaKHir wo

milte hi nigah ke donon KHush aaghaz se wo anjam se hum

duniya mein taKHallus koi na tha kya nil ka Tika 'shad' hi tha

tum wajh na puchho kuchh is ki chiDh jate hain kyun is nam se hum