ye tere hijr ki tanhai ke pale hue log

ye tire hijr kī tanhā.ī ke paale hue log

maare phirte haiñ tire dil se nikāle hue log

dil meñ ummīd tire vasl kī paale hue log

hijr ke dasht meñ vahshat ke nivāle hue log

kyā tamāshā hai ki kāñdhoñ pe nahīñ sar phir bhī

donoñ hāthoñ se haiñ dastār sañbhāle hue log

ye jo kahte haiñ ki ham tair ke bāhar aa.e

ye haiñ dar-asl samundar ke uchhāle hue log

is liye bhī mirā jaanā hai zarūrī 'shākir'

muntazir haiñ mire talvār nikāle hue log

ye tere hijr ki tanhai ke pale hue log

mare phirte hain tere dil se nikale hue log

dil mein ummid tere wasl ki pale hue log

hijr ke dasht mein wahshat ke niwale hue log

kya tamasha hai ki kandhon pe nahin sar phir bhi

donon hathon se hain dastar sanbhaale hue log

ye jo kahte hain ki hum tair ke bahar aae

ye hain dar-asl samundar ke uchhaale hue log

is liye bhi mera jaana hai zaruri 'shakir'

muntazir hain mere talwar nikale hue log