yun aa ke sham-e-dard ba-rang-e-sahar gai

yuuñ aa ke shām-e-dard ba-rañg-e-sahar ga.ī

chehre se mere dhuup ġhamoñ kī utar ga.ī

saa.il kī tarah log safoñ meñ khaḌe mile

jis rahguzār-e-zīst pe merī nazar ga.ī

ham rah-ravān-e-shauq kī qismat na pūchhiye

manzil jise bhī samjhā vo manzil guzar ga.ī

vo jān-e-ārzū ki jo thī sham-e-anjuman

dil DhūñDhtā hai us ko na jaane kidhar ga.ī

ik shakl-e-dilrubā jise dekhā thā ḳhvāb meñ

tasvīr kī tarah mire dil meñ utar ga.ī

jis bazm-e-dostāñ meñ sunāte the ham ġhazal

afsos sad afsos vo mahfil bikhar ga.ī

ab ke bahār aa.ī hai mānind-e-ā.ina

dekhā 'kamāl' maiñ ne to sūrat nikhar ga.ī

yun aa ke sham-e-dard ba-rang-e-sahar gai

chehre se mere dhup ghamon ki utar gai

sail ki tarah log safon mein khaDe mile

jis rahguzar-e-zist pe meri nazar gai

hum rah-rawan-e-shauq ki qismat na puchhiye

manzil jise bhi samjha wo manzil guzar gai

wo jaan-e-arzu ki jo thi sham-e-anjuman

dil DhunDhta hai us ko na jaane kidhar gai

ek shakl-e-dilruba jise dekha tha KHwab mein

taswir ki tarah mere dil mein utar gai

jis bazm-e-dostan mein sunate the hum ghazal

afsos sad afsos wo mahfil bikhar gai

ab ke bahaar aai hai manind-e-aina

dekha 'kamal' main ne to surat nikhar gai