yun ba-zahir to pas-e-pusht na Daloge hamein

yuuñ ba-zāhir to pas-e-pusht na Dāloge hameñ

jānte haiñ baḌī izzat se nikāloge hameñ

apnā ghar-bār hai ab.ād-e-makānī se buland

vaqt ko DhūñDne nikloge to pā loge hameñ

itne zālim na bano kuchh to muravvat sīkho

tum pe marte haiñ to kyā maar hī Dāloge hameñ

tum nahīñ aa.e nahīñ aa.e magar sochā thā

ham agar ruuTh bhī jaa.eñ to manā loge hameñ

ham tire sāmne ā.eñge nagīna ban kar

pahle ye va.ada karo phir se churā loge hameñ

tum bhī the bazm meñ ye soch ke ham ne pī lī

ham agar mast hue bhī to sañbhāloge hameñ

qābil-e-rahm bane phirte haiñ is aas pe ham

apne siine se kisī roz lagā loge hameñ

ham baḌī qīmtī miTTī se banā.e ga.e haiñ

ḳhud ko ham bechnā chāheñge to kyā loge hameñ

ham bhī kuchh apnī tamannā.eñ sunā.eñge tumheñ

jab tum apnī ye tamannā.eñ sunā loge hameñ

tum se ham duur chale aa.e haiñ sadiyoñ ke qarīb

raushnī ban ke agar aao to aa loge hameñ

ham na bhūleñge tumheñ jitnī bhī koshish kar lo

bhūlne ke liye har baar ḳhayāloge hameñ

yun ba-zahir to pas-e-pusht na Daloge hamein

jaante hain baDi izzat se nikaloge hamein

apna ghar-bar hai abaad-e-makani se buland

waqt ko DhunDne nikloge to pa loge hamein

itne zalim na bano kuchh to murawwat sikho

tum pe marte hain to kya mar hi Daloge hamein

tum nahin aae nahin aae magar socha tha

hum agar ruTh bhi jaen to mana loge hamein

hum tere samne aaenge nagina ban kar

pahle ye wada karo phir se chura loge hamein

tum bhi the bazm mein ye soch ke hum ne pi li

hum agar mast hue bhi to sanbhaaloge hamein

qabil-e-rahm bane phirte hain is aas pe hum

apne sine se kisi roz laga loge hamein

hum baDi qimti miTTi se banae gae hain

KHud ko hum bechna chahenge to kya loge hamein

hum bhi kuchh apni tamannaen sunaenge tumhein

jab tum apni ye tamannaen suna loge hamein

tum se hum dur chale aae hain sadiyon ke qarib

raushni ban ke agar aao to aa loge hamein

hum na bhulenge tumhein jitni bhi koshish kar lo

bhulne ke liye har bar KHayaloge hamein