yun Dhal gaya hai dard mein darman kabhi kabhi

yuuñ Dhal gayā hai dard meñ darmāñ kabhī kabhī

naġhme bane haiñ girya-e-pinhāñ kabhī kabhī

hauñkī haiñ bād-e-sub.h kī rau meñ bhī āñdhiyāñ

ublā hai sāhiloñ se bhī tūfāñ kabhī kabhī

baḌhtā chalā gayā huuñ unhī kī taraf kuchh aur

yuuñ bhī huā huuñ un se gurezāñ kabhī kabhī

āñchoñ meñ gungunāte haiñ gulzār gaah gaah

sho.aloñ se paT gayā hai gulistāñ kabhī kabhī

lai se nikal paḌī hai kabhī hichkiyoñ kī fauj

aaheñ banī haiñ raag kā unvāñ kabhī kabhī

dāmān-e-gul-ruḳhāñ kī uḌā dī haiñ dhajjiyāñ

phāḌā hai ham ne yuuñ bhī garebāñ kabhī kabhī

kaliyāñ jhulas ga.ī haiñ dahakne lage haiñ phuul

yuuñ bhī chalī hai bād-e-bahārāñ kabhī kabhī

us vaqt bhī ki ḳhātir-e-majmūa thī nasīb

kam-baḳht dil huā hai pareshāñ kabhī kabhī

yun Dhal gaya hai dard mein darman kabhi kabhi

naghme bane hain girya-e-pinhan kabhi kabhi

haunki hain baad-e-subh ki rau mein bhi aandhiyan

ubla hai sahilon se bhi tufan kabhi kabhi

baDhta chala gaya hun unhi ki taraf kuchh aur

yun bhi hua hun un se gurezan kabhi kabhi

aanchon mein gungunate hain gulzar gah gah

shoalon se paT gaya hai gulistan kabhi kabhi

lai se nikal paDi hai kabhi hichkiyon ki fauj

aahen bani hain rag ka unwan kabhi kabhi

daman-e-gul-ruKHan ki uDa di hain dhajjiyan

phaDa hai hum ne yun bhi gareban kabhi kabhi

kaliyan jhulas gai hain dahakne lage hain phul

yun bhi chali hai baad-e-bahaaran kabhi kabhi

us waqt bhi ki KHatir-e-majmua thi nasib

kam-baKHt dil hua hai pareshan kabhi kabhi