yun na koi teri mahfil mein pareshan ho jae

yuuñ na koī tirī mahfil meñ pareshāñ ho jaa.e

jaise āvāz-e-sabā dasht meñ hairāñ ho jaa.e

muntazir haiñ mirī aahaT kī balā.eñ kitnī

ek mushkil to nahīñ hai ki jo āsāñ ho jaa.e

chāk-e-dāman hī zamāne se nahīñ hotā rafū

aur agar siina kabhī chāk-e-garebāñ ho jaa.e

pech-dar-pech hai yuuñ silsila-e-zulf-e-hayāt

haath lagte hī jo kuchh aur bhī pechāñ ho jaa.e

dāġh-e-dil jalne lage bujh ga.ī har sham-e-tarab

yuuñ hai to yuuñ hī sahī ghar meñ charāġhāñ ho jaa.e

mujh pe qadġhan hai ki maiñ bazm meñ ḳhāmosh rahūñ

aur ḳhamoshī hī jo rusvā.ī kā sāmāñ ho jaa.e

nashtar-e-shauq ke hāthoñ gul-e-sad-barg hai dil

ḳhuub ho ab jo ye nazr-e-dam-e-tūfāñ ho jaa.e

kyuuñ na phir jalne lageñ rashk se vīrāna-o-dasth

shahr jab dil kī nigāhoñ meñ bayābāñ ho jaa.e

dil ko saudā hai rahe rañg-e-shafaq pesh-e-nazar

ġham ko ik taur to bahlāne kā sāmāñ ho jaa.e

raushnī shaam kī sun paa.e na āvāza-e-shab

mohr-e-zartāb kā āfāq se paimāñ ho jaa.e

baat is aañkh meñ poshīda hai vo 'arsh' ki jo

lab se nikle to mire siine pe paikāñ ho jaa.e

yun na koi teri mahfil mein pareshan ho jae

jaise aawaz-e-saba dasht mein hairan ho jae

muntazir hain meri aahaT ki balaen kitni

ek mushkil to nahin hai ki jo aasan ho jae

chaak-e-daman hi zamane se nahin hota rafu

aur agar sina kabhi chaak-e-gareban ho jae

pech-dar-pech hai yun silsila-e-zulf-e-hayat

hath lagte hi jo kuchh aur bhi pechan ho jae

dagh-e-dil jalne lage bujh gai har sham-e-tarab

yun hai to yun hi sahi ghar mein charaghan ho jae

mujh pe qadghan hai ki main bazm mein KHamosh rahun

aur KHamoshi hi jo ruswai ka saman ho jae

nashtar-e-shauq ke hathon gul-e-sad-barg hai dil

KHub ho ab jo ye nazr-e-dam-e-tufan ho jae

kyun na phir jalne lagen rashk se virana-o-dasth

shahr jab dil ki nigahon mein bayaban ho jae

dil ko sauda hai rahe rang-e-shafaq pesh-e-nazar

gham ko ek taur to bahlane ka saman ho jae

raushni sham ki sun pae na aawaza-e-shab

mohr-e-zartab ka aafaq se paiman ho jae

baat is aankh mein poshida hai wo 'arsh' ki jo

lab se nikle to mere sine pe paikan ho jae