yun nikalti hai meri baat dahan se uske

yuuñ nikaltī hai mirī baat dahan se us ke

jaise barsoñ kā ta.āruf ho badan se us ke

yuuñ sar-e-bazm milā TuuT ke ik umr pe vo

ham bhī ghabrā ga.e be-sāḳhta-pan se us ke

us kā lahja hai ki bahtī huī naġhmoñ kī nadī

jaise ilhām kī bārish ho suḳhan se us ke

us se mil ke bhī ḳhalā ab bhī vahī ruuh meñ hai

mutma.in dil bhī nahīñ sarv-o-saman se us ke

ḳhilqat-e-shahr ne afsāne tarāshe kyā kyā

dil tahī-dast hī lauTā hai chaman se us ke

is tarah shahr salīboñ se sajāyā us ne

koī mahfūz nahīñ dār-o-rasan se us ke

dekhnā kis ke lahū se hai charāġhāñ maqtal

ek ugtā huā sūraj hai kafan se us ke

yun nikalti hai meri baat dahan se us ke

jaise barson ka taaruf ho badan se us ke

yun sar-e-bazm mila TuT ke ek umr pe wo

hum bhi ghabra gae be-saKHta-pan se us ke

us ka lahja hai ki bahti hui naghmon ki nadi

jaise ilham ki barish ho suKHan se us ke

us se mil ke bhi KHala ab bhi wahi ruh mein hai

mutmain dil bhi nahin sarw-o-saman se us ke

KHilqat-e-shahr ne afsane tarashe kya kya

dil tahi-dast hi lauTa hai chaman se us ke

is tarah shahr salibon se sajaya us ne

koi mahfuz nahin dar-o-rasan se us ke

dekhna kis ke lahu se hai charaghan maqtal

ek ugta hua suraj hai kafan se us ke