یوں ضبط‌ مسلسل کا صلہ کیوں نہیں دیتے

یوں ضبط‌ مسلسل کا صلہ کیوں نہیں دیتے

ہر نقش تمنا ہی مٹا کیوں نہیں دیتے

منزل پہ بھی آسودۂ منزل نہ ہوا دل

پھر ہم کو بھٹکنے کی دعا کیوں نہیں دیتے

رہ رہ کے سلگتے ہیں خیالوں میں نئے غم

یادوں کے سمن زار جلا کیوں نہیں دیتے

اس سے تو حکایات جنوں اور بڑھیں گی

چپ کیوں ہو کوئی بات بنا کیوں نہیں دیتے

دل ہے تو کہیں نذر کرو کام تو آئے

سر ہے تو کسی در پہ جھکا کیوں نہیں دیتے

آئین کرم بھول گئے اہل نظر بھی

ماحول کو آئنہ دکھا کیوں نہیں دیتے

ملتا ہے پتہ جن کو ترے نام سے اپنا

وہ لوگ ہمیں تیرا پتہ کیوں نہیں دیتے

کیسے میں پکاروں کہ بہت دور ہوں تم سے

تم دل کے قریں ہو تو صدا کیوں نہیں دیتے