yunhi mar mar ke jien waqt guzare jaen

yūñhī mar mar ke ji.eñ vaqt guzāre jaa.eñ

zindagī ham tire hāthoñ se na maare jaa.eñ

ab zamīñ par koī gautam na mohammad na masīh

āsmānoñ se na.e log utāre jaa.eñ

vo jo maujūd nahīñ us kī madad chāhte haiñ

vo jo suntā hī nahīñ us ko pukāre jaa.eñ

baap larzāñ hai ki pahuñchī nahīñ bārāt ab tak

aur ham-joliyāñ dulhan ko sañvāre jaa.eñ

ham ki nādān juārī haiñ sabhī jānte haiñ

dil kī baazī ho to jī jaan se haare jaa.eñ

taj diyā tum ne dar-e-yār bhī uktā ke 'farāz'

ab kahāñ DhūñDhne ġham-ḳhvār tumhāre jaa.eñ

yunhi mar mar ke jien waqt guzare jaen

zindagi hum tere hathon se na mare jaen

ab zamin par koi gautam na mohammad na masih

aasmanon se nae log utare jaen

wo jo maujud nahin us ki madad chahte hain

wo jo sunta hi nahin us ko pukare jaen

bap larzan hai ki pahunchi nahin baraat ab tak

aur ham-joliyan dulhan ko sanware jaen

hum ki nadan juari hain sabhi jaante hain

dil ki bazi ho to ji jaan se haare jaen

taj diya tum ne dar-e-yar bhi ukta ke 'faraaz'

ab kahan DhunDhne gham-KHwar tumhaare jaen