zaban hai be-KHabar aur be-zaban dil

zabāñ hai be-ḳhabar aur be-zabāñ dil

kahe kis tarah se rāz-e-nihāñ dil

nahiñ duniyā ko dildārī kī aadat

sunā.e kis ko apnī dāstāñ dil

na pūchho be-Thikānoñ kā Thikānā

vahīñ ham bhī the sargardāñ jahāñ dil

kaTī hai zindagī sab rañj khāte

kahe kyā umar bhar kī dāstāñ dil

hameñ bhī thī kabhī milne kī lazzat

hamārā bhī kabhī thā naujavāñ dil

na baaz ā.ūñgā maiñ ulfat se jab tak

uThā.e jā.egā jaur-e-butāñ dil

ġham-e-ulfat ġham-e-duniyā ġham-e-dīñ

uThā.e baar kyā kyā nā-tavāñ dil

samajh meñ ḳhaak aa.e aql kī baat

ga.e hosh-o-ḳhirad aayā jahāñ dil

unheñ rahm aa.e to kyā aa.e 'parvīñ'

vo lā-parvā hai merā be-zabāñ dil

zaban hai be-KHabar aur be-zaban dil

kahe kis tarah se raaz-e-nihan dil

nahin duniya ko dildari ki aadat

sunae kis ko apni dastan dil

na puchho be-Thikanon ka Thikana

wahin hum bhi the sargardan jahan dil

kaTi hai zindagi sab ranj khate

kahe kya umar bhar ki dastan dil

hamein bhi thi kabhi milne ki lazzat

hamara bhi kabhi tha naujawan dil

na baz aaunga main ulfat se jab tak

uThae jaega jaur-e-butan dil

gham-e-ulfat gham-e-duniya gham-e-din

uThae bar kya kya na-tawan dil

samajh mein KHak aae aql ki baat

gae hosh-o-KHirad aaya jahan dil

unhen rahm aae to kya aae 'parwin'

wo la-parwa hai mera be-zaban dil