zabt-e-dil ne bhi ajab swang racha rakkha hai

zabt-e-dil ne bhī ajab svāñg rachā rakkhā hai

jaise sach-much hī koī raaz chhupā rakkhā hai

ishq ne vāqa.ī e.ajāz dikhā rakkhā hai

dil se vahshī ko bhī raste se lagā rakkhā hai

dil kī har baat ko tañg aa ke taġhāful se tire

ittifāqāt-e-zamāna pe uThā rakkhā hai

aañkh vo ḳhud koī hushyār nahīñ hai yaaro

lekin us ne mujhe dīvāna banā rakhā hai

ye bhī kyā kam hai ke us shoḳh ne be-mehrī ko

ishva-o-nāz ke parde meñ chhupā rakkhā hai

vo abhī ā.eñge ham ko bhī ḳhabar hai ai dil

bār-hā tū ne ye afsāna sunā rakkhā hai

ḳhuub vāqif huuñ raqīboñ kī tan-āsānī se

rāsta ghar kā tire sab ko batā rakkhā hai

zabt-e-dil ne bhi ajab swang racha rakkha hai

jaise sach-much hi koi raaz chhupa rakkha hai

ishq ne waqai eajaz dikha rakkha hai

dil se wahshi ko bhi raste se laga rakkha hai

dil ki har baat ko tang aa ke taghaful se tere

ittifaqat-e-zamana pe uTha rakkha hai

aankh wo KHud koi hushyar nahin hai yaro

lekin us ne mujhe diwana bana rakha hai

ye bhi kya kam hai ke us shoKH ne be-mehri ko

ishwa-o-naz ke parde mein chhupa rakkha hai

wo abhi aaenge hum ko bhi KHabar hai ai dil

bar-ha tu ne ye afsana suna rakkha hai

KHub waqif hun raqibon ki tan-asani se

rasta ghar ka tere sab ko bata rakkha hai