zaKHmi dilon ki pyas sarabon mein gum hui

zaḳhmī diloñ kī pyaas sarāboñ meñ gum huī

jo chashm vā thī bujhte charāġhoñ meñ gum huī

phirtī hai us ko DhūñDtī ab maut kū-ba-kū

ye zindagī to terī nigāhoñ meñ gum huī

chalnā likhā hai apne muqaddar meñ umr bhar

manzil hamārī dard kī rāhoñ meñ gum huī

ham DhūñDne chale haiñ kahāñ paikar-e-ḳhayāl

chashm-e-havas to gum-shuda ḳhvāboñ gum huī

ḳhushbū ne rasta chhoḌ diyā intizār kā

miTTī meñ ḳhufta bikhre gulāboñ meñ gum huī

aurāq ke palaTne se kuchh bhī nahīñ milā

dānish hamārī saarī kitāboñ meñ gum huī

'māmūn' zauq-e-ishq se miltā bhī kyā hameñ

āb-e-ravāñ kī mauj kitāboñ meñ gum huī

zaKHmi dilon ki pyas sarabon mein gum hui

jo chashm wa thi bujhte charaghon mein gum hui

phirti hai us ko DhunDti ab maut ku-ba-ku

ye zindagi to teri nigahon mein gum hui

chalna likha hai apne muqaddar mein umr bhar

manzil hamari dard ki rahon mein gum hui

hum DhunDne chale hain kahan paikar-e-KHayal

chashm-e-hawas to gum-shuda KHwabon gum hui

KHushbu ne rasta chhoD diya intizar ka

miTTi mein KHufta bikhre gulabon mein gum hui

auraq ke palaTne se kuchh bhi nahin mila

danish hamari sari kitabon mein gum hui

'mamun' zauq-e-ishq se milta bhi kya hamein

aab-e-rawan ki mauj kitabon mein gum hui