zaKHmi hun tere nawak-e-duz-dida-nazar se

zaḳhmī huuñ tire nāvak-e-duz-dīda-nazar se

jaane kā nahīñ chor mire zaḳhm-e-jigar se

ham ḳhuub haiñ vāqif tire andāz-e-kamar se

ye taar nikaltā hai koī dil ke guhar se

phir aa.e agar jiite vo ka.abe ke safar se

to jaano phire shaiḳh-jī allāh ke ghar se

sarmāya-e-ummīd hai kyā paas hamāre

ik aah hai siine meñ so na-ummīd asar se

vo ḳhulq se pesh aate haiñ jo faiz-rasāñ haiñ

haiñ shāḳh-e-samar-dār meñ gul pahle samar se

hāzir haiñ mire jazba-e-vahshat ke jilau meñ

bāñdhe hue kohsār bhī dāman ko kamar se

labrez mai-e-sāf se hoñ jām-e-bilorīñ

zamzam se hai matlab na safā se na hajar se

ashkoñ meñ bahe jaate haiñ ham sū-e-dar-e-yār

maqsūd rah-e-ka.aba hai dariyā ke safar se

fariyād-e-sitam-kash hai vo shamshīr-e-kashīda

jis kā na ruke vaar falak kī bhī sipar se

khultā nahīñ dil band hī rahtā hai hamesha

kyā jaane ki aa jaa.e hai tū is meñ kidhar se

uf garmī-e-vahshat ki mirī Thokaroñ hī meñ

patthar haiñ pahāḌoñ ke uḌe jaate sharar se

kuchh rahmat-e-bārī se nahīñ duur ki saaqī

ro.eñ jo zarā mast to mai abr se barse

maiñ kushta huuñ kis chashm-e-siyah-mast kā yā rab

Tapke hai jo mastī mirī turbat ke shajar se

nāloñ ke asar se mire phoḌā sā hai paktā

kyuuñ riim sadā nikle na aahan ke jigar se

ai 'zauq' kisī hamdam-e-derīna kā milnā

behtar hai mulāqāt-e-masīhā-o-ḳhizar se

zaKHmi hun tere nawak-e-duz-dida-nazar se

jaane ka nahin chor mere zaKHm-e-jigar se

hum KHub hain waqif tere andaz-e-kamar se

ye tar nikalta hai koi dil ke guhar se

phir aae agar jite wo kabe ke safar se

to jaano phire shaiKH-ji allah ke ghar se

sarmaya-e-ummid hai kya pas hamare

ek aah hai sine mein so na-ummid asar se

wo KHulq se pesh aate hain jo faiz-rasan hain

hain shaKH-e-samar-dar mein gul pahle samar se

hazir hain mere jazba-e-wahshat ke jilau mein

bandhe hue kohsar bhi daman ko kamar se

labrez mai-e-saf se hon jam-e-bilorin

zamzam se hai matlab na safa se na hajar se

ashkon mein bahe jate hain hum su-e-dar-e-yar

maqsud rah-e-kaba hai dariya ke safar se

fariyaad-e-sitam-kash hai wo shamshir-e-kashida

jis ka na ruke war falak ki bhi sipar se

khulta nahin dil band hi rahta hai hamesha

kya jaane ki aa jae hai tu is mein kidhar se

uf garmi-e-wahshat ki meri Thokaron hi mein

patthar hain pahaDon ke uDe jate sharar se

kuchh rahmat-e-bari se nahin dur ki saqi

roen jo zara mast to mai abr se barse

main kushta hun kis chashm-e-siyah-mast ka ya rab

Tapke hai jo masti meri turbat ke shajar se

nalon ke asar se mere phoDa sa hai pakta

kyun rim sada nikle na aahan ke jigar se

ai 'zauq' kisi hamdam-e-derina ka milna

behtar hai mulaqat-e-masiha-o-KHizar se