zamin mile kahin hamein kahin to aasman mile

zamīñ mile kahīñ hameñ kahīñ to āsmāñ mile

dukhoñ kī dhuup meñ shajar koī to mehrbāñ mile

tire firāq meñ jiye tire firāq meñ mare

chalo ye ḳhvāb hī sahī visāl kā gumāñ mile

alam kī shaam aa ga.ī lo mere naam aa ga.ī

charāġh le ke raah meñ ai kaash mehrbāñ mile

abhī talak fuġhāñ huuñ maiñ misāl-e-dāstāñ huuñ maiñ

mile to ek pal kabhī kahīñ to kārvāñ mile

ajiib se vo rañg the sabhī ke haath sañg the

hameñ to ġhair bhī sabhī misāl-e-dostāñ mile

jabīñ jabīñ nahīñ rahī to mah-jabīñ nahīñ rahī

na log vo kahīñ mile na tujh ko āstāñ mile

zamin mile kahin hamein kahin to aasman mile

dukhon ki dhup mein shajar koi to mehrban mile

tere firaq mein jiye tere firaq mein mare

chalo ye KHwab hi sahi visal ka guman mile

alam ki sham aa gai lo mere nam aa gai

charagh le ke rah mein ai kash mehrban mile

abhi talak fughan hun main misal-e-dastan hun main

mile to ek pal kabhi kahin to karwan mile

ajib se wo rang the sabhi ke hath sang the

hamein to ghair bhi sabhi misal-e-dostan mile

jabin jabin nahin rahi to mah-jabin nahin rahi

na log wo kahin mile na tujh ko aastan mile