zamin par hashr kuchh aisa bapa hai

zamīñ par hashr kuchh aisā bapā hai

har insāñ apne andar chhup gayā hai

fazāoñ meñ har ik sū raushnī hai

na jaane aaj kis kā ghar jalā hai

use koshish meñ paḌhne kī lagā huuñ

varaq jo mere dil ne likh diyā hai

nazar aatī nahīñ hai shakl koī

bas ik saayā ḳhalā meñ chal rahā hai

diye haiñ apne-pan ne zaḳhm itne

koī hañs kar mile dil kāñptā hai

vahī ik yaad jo dil meñ basī thī

vahī to ab mire dil kī davā hai

ḳhalish taḌpā rahī thī kab se 'ādil'

nishān-e-zaḳhm ab jā kar milā hai

zamin par hashr kuchh aisa bapa hai

har insan apne andar chhup gaya hai

fazaon mein har ek su raushni hai

na jaane aaj kis ka ghar jala hai

use koshish mein paDhne ki laga hun

waraq jo mere dil ne likh diya hai

nazar aati nahin hai shakl koi

bas ek saya KHala mein chal raha hai

diye hain apne-pan ne zaKHm itne

koi hans kar mile dil kanpta hai

wahi ek yaad jo dil mein basi thi

wahi to ab mere dil ki dawa hai

KHalish taDpa rahi thi kab se 'adil'

nishan-e-zaKHm ab ja kar mila hai