زمیں صحرا کی اک اک بوند کی خاطر ترستی ہے

زمیں صحرا کی اک اک بوند کی خاطر ترستی ہے

تو اے برسات کیوں جا کر سمندر پر برستی ہے

نہ اونچا آسماں تیرا نہ نیچی ہے زمیں میری

فقط اک فاصلہ ہے بس بلندی ہے نہ پستی ہے

ہمیں اے شیخ ہر بت میں خدا کا نور دکھتا ہے

ہماری بت پرستی در حقیقت حق پرستی ہے

یہاں ہر اک قدم پر موت کا سامان بکھرا ہے

درندو مت یہاں آنا یہ انسانوں کی بستی ہے

کھلے جو راز ہستی تو نہ جانے کیا ہو ہنگامہ

ہے ہستی تب تلک جب تک نہاں یہ راز ہستی ہے

امیری کا ہو عالم اے صداؔ یا تنگ دستی کا

رضا میں اس کی رہنا سیکھ پھر مستی ہی مستی ہے