zanjir kaT ke kya giri aadhe safar ke bich

zanjīr kaT ke kyā girī aadhe safar ke biich

maiñ sar pakaḌ ke baiTh gayā rahguzar ke biich

utrā lahad meñ ḳhvāhishoñ ke saath aadmī

jaise musāfiroñ-bharī naav bhañvar ke biich

dushman se kyā bachā.eñgī ye jhāḌiyāñ mujhe

bachte nahīñ yahāñ to payambar shajar ke biich

jitnā uḌā maiñ utnā ulajhtā chalā gayā

ik tār-e-kam-numā thā mire bāl-o-par ke biich

dete ho dastakeñ yahāñ sar phoḌte ho vaañ

kuchh farq to ravā rakho dīvār-o-dar ke biich

ghar se chalā to ghar kī udāsī sisak uThī

maiñ ne use bhī rakh liyā raḳht-e-safar ke biich

thakne ke ham nahīñ the magar ab ke yuuñ huā

detā rahā fareb sitāra safar ke biich

merā sabhī ke saath ravayya hai ek sā

'shāhid' mujhe tamīz nahīñ ḳhair o shar ke biich

zanjir kaT ke kya giri aadhe safar ke bich

main sar pakaD ke baiTh gaya rahguzar ke bich

utra lahad mein KHwahishon ke sath aadmi

jaise musafiron-bhari naw bhanwar ke bich

dushman se kya bachaengi ye jhaDiyan mujhe

bachte nahin yahan to payambar shajar ke bich

jitna uDa main utna ulajhta chala gaya

ek tar-e-kam-numa tha mere baal-o-par ke bich

dete ho dastaken yahan sar phoDte ho wan

kuchh farq to rawa rakho diwar-o-dar ke bich

ghar se chala to ghar ki udasi sisak uThi

main ne use bhi rakh liya raKHt-e-safar ke bich

thakne ke hum nahin the magar ab ke yun hua

deta raha fareb sitara safar ke bich

mera sabhi ke sath rawayya hai ek sa

'shahid' mujhe tamiz nahin KHair o shar ke bich