زوال غیرت اہل شرف پہ کیا کہئے

زوال غیرت اہل شرف پہ کیا کہئے

چلی ہے رسم کہ فرعون کو خدا کہیے

فغان مرغ کو ناقوس کی صدا کہیے

اٹھے چمن سے دھواں تو اسے گھٹا کہیے

ہر اک حماقت حاکم پہ واہ وا کہیے

وہ لاکھ جھوٹ کہے آپ مرحبا کہیے

بچیں وبا سے تو حاکم کو شکریہ کہیے

مریں وبا سے تو اللہ کی تھی رضا کہیے

کرے سوال جو حاکم سے ہے عدوئے وطن

کہے جو جھوٹ کو جھوٹ اس کو کج ادا کہیے

قتیل حزب مخالف سے ہو تو اس پر ہی

لگا کے تہمتیں، قاتل کو مرحبا کہیے

یہ وقت ہے بڑا نازک ذرا سنبھل کے صداؔ

ہے خیر اسی میں کہ رہزن کو رہنما کہیے