zawal-e-husn ko husn-e-nigar kya jaane

zavāl-e-husn ko husn-e-nigār kyā jaane

ḳhizāñ qadam-ba-qadam hai bahār kyā jaane

likhā hai us ke muqaddar meñ iztirāb-e-davām

qarār kyā hai dil-e-be-qarār kyā jaane

nasīb rāhat-e-qurb-e-davām ho jis ko

vo lazzat-e-ḳhalish-e-intizār kyā jaane

samajh rahe haiñ jise sab gunāhgār yahāñ

usī pe ho karam-e-kirdgār kyā jaane

kiye pe apne ho ḳhud munfa.il bashar āḳhir

yahī ho jabr yahī iḳhtiyār kyā jaane

taḌap rahā huuñ maiñ apne gunāh gin gin kar

usī kā naam ho roz-e-shumār kyā jaane

kahāñ ye shām-e-ġharībāñ kahāñ vo sub.h-e-vatan

vo farq-e-gardish-e-lail-o-nihār kyā jaane

jo paañv toḌ ke baiThe sar-e-rah-e-manzil

vo kab uTheñge koī shahsavār kyā jaane

ba-īñ kamāl-e-ḳhirad kyuuñ hai mā.il-e-ilhād

maqām-e-'josh' ko 'mahrūm'-e-zār kyā jaane

zawal-e-husn ko husn-e-nigar kya jaane

KHizan qadam-ba-qadam hai bahaar kya jaane

likha hai us ke muqaddar mein iztirab-e-dawam

qarar kya hai dil-e-be-qarar kya jaane

nasib rahat-e-qurb-e-dawam ho jis ko

wo lazzat-e-KHalish-e-intizar kya jaane

samajh rahe hain jise sab gunahgar yahan

usi pe ho karam-e-kirdgar kya jaane

kiye pe apne ho KHud munfail bashar aaKHir

yahi ho jabr yahi iKHtiyar kya jaane

taDap raha hun main apne gunah gin gin kar

usi ka nam ho roz-e-shumar kya jaane

kahan ye sham-e-ghariban kahan wo subh-e-watan

wo farq-e-gardish-e-lail-o-nihaar kya jaane

jo panw toD ke baiThe sar-e-rah-e-manzil

wo kab uThenge koi shahsawar kya jaane

ba-in kamal-e-KHirad kyun hai mail-e-ilhad

maqam-e-'josh' ko 'mahrum'-e-zar kya jaane