zehn ho tang to phir shoKHi-e-afkar na rakh

zehn ho tañg to phir shoḳhī-e-afkār na rakh

band tah-ḳhānoñ meñ ye daulat-e-bedār na rakh

zaḳhm khānā hī jo Thahrā to badan terā hai

ḳhauf kā naam magar lazzat-e-āzār na rakh

ek hī chiiz ko rahnā hai salāmat pyāre

ab jo sar shānoñ pe rakkhā hai to dīvār na rakh

ḳhvāhisheñ toḌ na Dāleñ tire siine kā qafas

itne shah-zor parindoñ ko giraftār na rakh

ab maiñ chup huñ to mujhe apnī dalīloñ se na kaaT

merī TuuTī huī talvār pe talvār na rakh

aaj se dil bhī tire haal meñ hotā hai sharīk

le ye hasrat bhī mirī chashm-e-gunahgār na rakh

vaqt phir jaane kahāñ us se milā de tujh ko

is qadar tark-e-mulāqāt kā pindār na rakh

zehn ho tang to phir shoKHi-e-afkar na rakh

band tah-KHanon mein ye daulat-e-bedar na rakh

zaKHm khana hi jo Thahra to badan tera hai

KHauf ka nam magar lazzat-e-azar na rakh

ek hi chiz ko rahna hai salamat pyare

ab jo sar shanon pe rakkha hai to diwar na rakh

KHwahishen toD na Dalen tere sine ka qafas

itne shah-zor parindon ko giraftar na rakh

ab main chup hun to mujhe apni dalilon se na kaT

meri TuTi hui talwar pe talwar na rakh

aaj se dil bhi tere haal mein hota hai sharik

le ye hasrat bhi meri chashm-e-gunahgar na rakh

waqt phir jaane kahan us se mila de tujh ko

is qadar tark-e-mulaqat ka pindar na rakh