zindagi ek dard-o-gham ka saz hai

zindagī ik dard-o-ġham kā saaz hai

maut jis kī āḳhirī āvāz hai

vaañ to ā.īna hai mashq-e-nāz hai

muntashir yaañ zindagī kā saaz hai

dil hamārā dard se ḳhālī na kar

ye hamārī zindagī kā raaz hai

aaj phir barseñge naġhme bazm meñ

aaj phir hāthoñ pe us ke saaz hai

har nishāna dil pe lagtā hai mire

kaun kohna-mashq tīr-andāz hai

sun rahā huuñ dil se naġhmoñ kī sadā

dost se miltī huī āvāz hai

naġhma-bāz ik zindagī kā saaz hai

dahr kā har zarra ham-āvāz hai

jal rahā hai jism kā ḳhākī qafas

tā.ir-e-jāñ mā.il-e-parvāz hai

ḳhatm kar 'ālī' fasāna ḳhatm kar

sunñe vaalā mahv-e-ḳhvāb-e-nāz hai

zindagi ek dard-o-gham ka saz hai

maut jis ki aaKHiri aawaz hai

wan to aaina hai mashq-e-naz hai

muntashir yan zindagi ka saz hai

dil hamara dard se KHali na kar

ye hamari zindagi ka raaz hai

aaj phir barsenge naghme bazm mein

aaj phir hathon pe us ke saz hai

har nishana dil pe lagta hai mere

kaun kohna-mashq tir-andaz hai

sun raha hun dil se naghmon ki sada

dost se milti hui aawaz hai

naghma-baz ek zindagi ka saz hai

dahr ka har zarra ham-awaz hai

jal raha hai jism ka KHaki qafas

tair-e-jaan mail-e-parwaz hai

KHatm kar 'ali' fasana KHatm kar

sunne wala mahw-e-KHwab-e-naz hai