zindagi mail-e-fariyaad-o-fughan aaj bhi hai

zindagī mā.il-e-fariyād-o-fuġhāñ aaj bhī hai

kal bhī thā siine pe ik sañg-e-girāñ aaj bhī hai

dil-e-afsurda ko pahlū meñ liye baiThe haiñ

bazm meñ majma.a-e-ḳhasta-jigarāñ aaj bhī hai

talḳhī-e-koh-kanī kal bhī mirā hissa thā

jām-e-shīrīñ ba-nasīb-e-dīgarāñ aaj bhī hai

zaḳhm-e-dil ke nahīñ āsār ba-zāhir lekin

chāra-gar se gila-e-dard-e-nihāñ aaj bhī hai

aaj bhī garm hai bāzār jafā-kāroñ kā

kal bhī ārāsta thī un kī dukāñ aaj bhī hai

gosha-e-amn nahīñ aaj bhī bulbul ko nasīb

chashm-e-sayyād bahar-sū nigarāñ aaj bhī hai

aaj bhī zaḳhm-e-rag-e-gul se Tapaktā hai lahū

ḳhuuñ meñ Duubī huī kāñToñ kī zabāñ aaj bhī hai

zindagī chauñk ke bedār huī hai lekin

chashm-o-dil par asar-e-ḳhvāb-e-girāñ aaj bhī hai

is taraf jins-e-vafā kī vahī arzānī hai

us taraf ik nigah-e-lutf-e-girāñ aaj bhī hai

haif kyuuñ qismat-e-shā.er pe na aa.e 'ājiz'

kal bhī kam-baḳht rahā marsiyāñ-ḳhvāñ aaj bhī hai

zindagi mail-e-fariyaad-o-fughan aaj bhi hai

kal bhi tha sine pe ek sang-e-giran aaj bhi hai

dil-e-afsurda ko pahlu mein liye baiThe hain

bazm mein majma-e-KHasta-jigaran aaj bhi hai

talKHi-e-koh-kani kal bhi mera hissa tha

jam-e-shirin ba-nasib-e-digaran aaj bhi hai

zaKHm-e-dil ke nahin aasar ba-zahir lekin

chaara-gar se gila-e-dard-e-nihan aaj bhi hai

aaj bhi garm hai bazar jafa-karon ka

kal bhi aarasta thi un ki dukan aaj bhi hai

gosha-e-amn nahin aaj bhi bulbul ko nasib

chashm-e-sayyaad bahar-su nigaran aaj bhi hai

aaj bhi zaKHm-e-rag-e-gul se Tapakta hai lahu

KHun mein Dubi hui kanTon ki zaban aaj bhi hai

zindagi chaunk ke bedar hui hai lekin

chashm-o-dil par asar-e-KHwab-e-giran aaj bhi hai

is taraf jins-e-wafa ki wahi arzani hai

us taraf ek nigah-e-lutf-e-giran aaj bhi hai

haif kyun qismat-e-shaer pe na aae 'ajiz'

kal bhi kam-baKHt raha marsiyan-KHwan aaj bhi hai