koi rasta hai na manzil na to ghar hai koi

koī rasta hai na manzil na to ghar hai koī

aap kahiyegā safar ye bhī safar hai koī

pass-bōk par to nazar hai ki kahāñ rakkhī hai

pyaar ke ḳhat kā pata hai na ḳhabar hai koī

Thokareñ de ke tujhe us ne to samjhāyā bahut

ek Thokar kā bhī kyā tujh pe asar hai koī

rāt-din apne ishāroñ pe nachātā hai mujhe

maiñ ne dekhā to nahīñ mujh meñ magar hai koī

ek bhī dil meñ na utrī, na koī dost banā

yaar tū ye to batā ye bhī nazar hai koī

pyaar se haath milāne se hī pul bante haiñ

kaaT do, kaaT do gar dil meñ bhañvar hai koī

maut dīvār hai, dīvār ke us paar se ab

mujh ko rah rah ke bulātā hai udhar hai koī

saarī duniyā meñ luTātā hī rahā pyaar apnā

kaun hai, sunet haiñ, 'bechain-kuñvar' hai koī

koi rasta hai na manzil na to ghar hai koi

aap kahiyega safar ye bhi safar hai koi

pass-book par to nazar hai ki kahan rakkhi hai

pyar ke KHat ka pata hai na KHabar hai koi

Thokaren de ke tujhe us ne to samjhaya bahut

ek Thokar ka bhi kya tujh pe asar hai koi

raat-din apne ishaaron pe nachata hai mujhe

main ne dekha to nahin mujh mein magar hai koi

ek bhi dil mein na utri, na koi dost bana

yar tu ye to bata ye bhi nazar hai koi

pyar se hath milane se hi pul bante hain

kaT do, kaT do gar dil mein bhanwar hai koi

maut diwar hai, diwar ke us par se ab

mujh ko rah rah ke bulata hai udhar hai koi

sari duniya mein luTata hi raha pyar apna

kaun hai, sunet hain, 'bechain-kunwar' hai koi