id milne ka ek bahana hua

iid milne kā ik bahāna huā

kaaT kar jeb vo ravāna huā

leaderī meñ bhalā huā un kā

bandagī meñ mirā bhalā na huā

ek meñDhe pe hī nahīñ mauqūf

tujh pe qurbān ik zamāna huā

ye avāmī banā rahe haiñ league

kyā mazāq in kā āmiyāna huā

jahāñ rahtī thī ''zoara-jān'' kabhī

pīr-sāhib kā āstāna huā

apnā ''bandū'' bhī ban gayā leader

jab allot ek kārḳhāna huā

ham to be-dāl ke rahe būdam

pā ke daulat vo ''daulatāna'' huā

maiñ likhūñgā 'majīd' yūñhī ġhazal

tañg agar in meñ qāfiya na huā

id milne ka ek bahana hua

kaT kar jeb wo rawana hua

leaderi mein bhala hua un ka

bandagi mein mera bhala na hua

ek meinDhe pe hi nahin mauquf

tujh pe qurban ek zamana hua

ye awami bana rahe hain league

kya mazaq in ka aamiyana hua

jahan rahti thi zoara-jaan kabhi

pir-sahib ka aastana hua

apna bandu bhi ban gaya leader

jab allot ek karKHana hua

hum to be-dal ke rahe budam

pa ke daulat wo daulatana hua

main likhunga 'majid' yunhi ghazal

tang agar in mein qafiya na hua