laDki ki dua

lab pe aatī hai duā ban ke tamannā merī

zindagī bhar kare āshiq mirā sevā merī

sub.h se shaam talak ho ke magan gaatā rahe

merā āshiq mirī ulfat meñ bhajan gaatā rahe

yuuñ maiñ chamkūñ ki zamāne meñ añdherā ho jaa.e

koī lañgDā koī andhā koī luulā ho jaa.e

mere jalvoñ ko atā kar de vo qudrat yā-rab

merī nafrat ko bhī samjhe vo mohabbat yā-rab

merī fitrat ho amīroñ se mohabbat karnā

aur ġharīboñ kī sar-e-rāh marammat karnā

bhole-bhāloñ kī raqam ḳhuub khilānā mujh ko

mire allāh sagā.ī se bachānā mujh ko

tū hai muḳhtār har ik raaz kā yazdānī hai

duudh laane kī mire ghar meñ pareshānī hai

peshgī hī mire darzī kī raqam bhī bhar de

vaqt paḌ jaa.e to daddy kī chilam bhī bhar de

apnī daulat kī mire haath meñ jholī de de

aisā āshiq nahīñ darkār jo golī de de

merā 'lachhman' sā ho devar mujhe maqdūr nahīñ

'rām' jaisā mirā shauhar ho ye manzūr nahīñ

jo pick-up kartā rahe pyaar kī bāñhoñ meñ mujhe

dekh saktā ho jo aġhyār kī bāñhoñ meñ mujhe

da.ave rakhtā na ho jo yaar patī hone kā

jazba rakhtā ho jo biivī pe satī hone kā

merī ulfat meñ use kar de tū pāgal maulā

maiñ kahūñ chaa.e to mañgvā de vo campa-cola

aa.ī āvāz-e-ḳhudāvand diye dete haiñ

dāḳhila terā J.N.U meñ kiye dete haiñ

lab pe aati hai dua ban ke tamanna meri

zindagi bhar kare aashiq mera sewa meri

subh se sham talak ho ke magan gata rahe

mera aashiq meri ulfat mein bhajan gata rahe

yun main chamkun ki zamane mein andhera ho jae

koi langDa koi andha koi lula ho jae

mere jalwon ko ata kar de wo qudrat ya-rab

meri nafrat ko bhi samjhe wo mohabbat ya-rab

meri fitrat ho amiron se mohabbat karna

aur gharibon ki sar-e-rah marammat karna

bhole-bhaalon ki raqam KHub khilana mujh ko

mere allah sagai se bachana mujh ko

tu hai muKHtar har ek raaz ka yazdani hai

dudh lane ki mere ghar mein pareshani hai

peshgi hi mere darzi ki raqam bhi bhar de

waqt paD jae to daddy ki chilam bhi bhar de

apni daulat ki mere hath mein jholi de de

aisa aashiq nahin darkar jo goli de de

mera 'lachhman' sa ho dewar mujhe maqdur nahin

'ram' jaisa mera shauhar ho ye manzur nahin

jo pick-up karta rahe pyar ki banhon mein mujhe

dekh sakta ho jo aghyar ki banhon mein mujhe

dawe rakhta na ho jo yar pati hone ka

jazba rakhta ho jo biwi pe sati hone ka

meri ulfat mein use kar de tu pagal maula

main kahun chae to mangwa de wo campa-cola

aai aawaz-e-KHudawand diye dete hain

daKHila tera JNU mein kiye dete hain