rahega pyason se pani ka fasla kab tak

rahegā pyāsoñ se paanī kā fāsla kab tak

rahegā ghar mirā maidān-e-karbalā kab tak

tire paḌos ke patthar kabhī to jāgeñge

rahegā kāñch ke mahloñ meñ tū ḳhudā kab tak

ye zard zard sī madqūq koñpaloñ ke liye

mire badan kā rahegā shajar harā kab tak

chhupā sakūñgā kahāñ tak maiñ apnā uryāñ badan

tanī rahegī añdheroñ kī ye ridā kab tak

kisī kī zulf ke bādal ke paas baiThā huuñ

ye dekhnā hai ki barsegī ye ghaTā kab tak

na chheḌegā koī sailāb-e-ārzū 'sāġhar'

Tikegā aañkh kī putlī pe aabla kab tak

rahega pyason se pani ka fasla kab tak

rahega ghar mera maidan-e-karbala kab tak

tere paDos ke patthar kabhi to jagenge

rahega kanch ke mahlon mein tu KHuda kab tak

ye zard zard si madquq konpalon ke liye

mere badan ka rahega shajar hara kab tak

chhupa sakunga kahan tak main apna uryan badan

tani rahegi andheron ki ye rida kab tak

kisi ki zulf ke baadal ke pas baiTha hun

ye dekhna hai ki barsegi ye ghaTa kab tak

na chheDega koi sailab-e-arzu 'saghar'

Tikega aankh ki putli pe aabla kab tak