aaj-kal kahe ko batlate ho gustaKHi muaf

āj-kal kaahe ko batlāte ho gustāḳhī muaaf

rāstī ye hai ki va.ade haiñ tumhāre sab ḳhilāf

aah barchhī sī lagī thī tiir sī dil kī tapish

hijr kī shab mujh pe guzrī ġhairat-e-roz-e-masāf

ek din maiñ ne likhā thā us ko apnā dard-e-dil

aaj tak jaatā nahīñ siine se ḳhāme ke shigāf

paañv par se apne merā sar uThāne mat jhuko

teġh bāñdhī hai miyāñ tum ne kamar meñ ḳhush-ġhilāf

saf ulaT jā āshiqoñ kī gar tire abrū hileñ

ek dam talvār ke chalne meñ hove mulk saaf

shaiḳh mat rū-kash ho mastoñ kā tū is jubbe upar

lete istinje ko Dhelā terī Tal jaatī hai naaf

ishq ke bāzār meñ saudā na kiijo tū to 'mīr'

sar ko jab vaañ bech chukte haiñ to ye hai dast-lāf

aaj-kal kahe ko batlate ho gustaKHi muaf

rasti ye hai ki wade hain tumhaare sab KHilaf

aah barchhi si lagi thi tir si dil ki tapish

hijr ki shab mujh pe guzri ghairat-e-roz-e-masaf

ek din main ne likha tha us ko apna dard-e-dil

aaj tak jata nahin sine se KHame ke shigaf

panw par se apne mera sar uThane mat jhuko

tegh bandhi hai miyan tum ne kamar mein KHush-ghilaf

saf ulaT ja aashiqon ki gar tere abru hilen

ek dam talwar ke chalne mein howe mulk saf

shaiKH mat ru-kash ho maston ka tu is jubbe upar

lete istinje ko Dhela teri Tal jati hai naf

ishq ke bazar mein sauda na kijo tu to 'mir'

sar ko jab wan bech chukte hain to ye hai dast-laf