dur bahut bhago ho humse sikhe tariq ghazalon ka

duur bahut bhāgo ho ham se sīkhe tarīq ġhazāloñ kā

vahshat karnā sheva hai kyā achchhī āñkhoñ vāloñ kā

sūrat-gar kī pareshānī ne tuul nihāyat khīñchā hai

ham ne kyoñ bistār kiyā thā us ke lambe bāloñ kā

bahut kiyā to patthar meñ sūrāḳh kiye haiñ dur-fashoñ ne

chhed jigar meñ kar denā ye kaam hai mahzūñ nāloñ kā

sarv lab-e-jū lāla-o-gul nasrīn-o-saman haiñ shagūfa hai

dekho jidhar ik baaġh lagā hai apne rangīñ ḳhayāloñ kā

ġhuncha huā hai ḳhār-e-bayābāñ ba.ad ziyārat karne ke

paanī tabarruk karte haiñ sab paañv ke mere chhāloñ kā

pahle tadāruk kuchh hotā to nafā bhī hotā so to 'mīr'

kaam hai āḳhir ishq meñ us ke bīmāroñ bad-hāloñ kā

dur bahut bhago ho hum se sikhe tariq ghazalon ka

wahshat karna shewa hai kya achchhi aankhon walon ka

surat-gar ki pareshani ne tul nihayat khincha hai

hum ne kyon bistar kiya tha us ke lambe baalon ka

bahut kiya to patthar mein suraKH kiye hain dur-fashon ne

chhed jigar mein kar dena ye kaam hai mahzun nalon ka

sarw lab-e-ju lala-o-gul nasrin-o-saman hain shagufa hai

dekho jidhar ek bagh laga hai apne rangin KHayalon ka

ghuncha hua hai KHar-e-bayaban baad ziyarat karne ke

pani tabarruk karte hain sab panw ke mere chhaalon ka

pahle tadaruk kuchh hota to nafa bhi hota so to 'mir'

kaam hai aaKHir ishq mein us ke bimaron bad-haalon ka